капутот и слонот

Koга ќе работам и заработувам ќе можам да си дозволам Lee Oscar хармоника, Лаика М7 апарат, Џим Бим бурбон и билет за Исланд ама поради самата работа нема да можам да уживам во ништо од тоа или барем поради психофизичкото абење нема да биди тоа-тоа.



Се сеќавам кога со Драж шетавме низ Битола да си купи капут.Тогаш Драж уште не го знаеше градот.Одевме од бутик до бутик низ градот за да најме нешто соодветно.Драж да е жив и здрав малце работи го собираа.Нозете ни паднаа.Конечно влегваме во еден бутик на Широк Сокак и гледаме еден "мафијашки" модел каков шо сакаше.Изгорен беше за таков.Под колена, црн и со скриени копчиња.Згора на се точен.Ко за него шиен.

-Леле колку е закон браааат.Леле колку е убав.
(Ја гледа цената. 6500 денари)
-Абеее капут.Шо ќе ми е капут?

Драж замина да студира Словенија.Батали студирање и почна да работи.Носеше коли за Македонија.Едно време се засити пазарот, па почна да работи како bell boy(Буковски исто работел мислам) во хотел.Носеше куфери на дебели американци и на германски ороспии.Собра пари и си купи капут.Плус си купи и црн мерцедес S класа на старо да му одговара на капутот.Неговата најстара желба.Да го има "слонот".Во средно стално се расправавме за тоа.

-Абе брат, многу троши бе...скапи делој има, нема модел понов од 92'...шо ќе ти е таква кола.Ако земаш некогаш нешто...земи си нешто практично..ко за низ град.
Драж беше прагматичен чоек ама кога беше во прашање "слонот" беше романтичар.
-Море, на дете мало да му дајш хартија и пенкало и да му речиш да ти нацрта кола шо ќе ти нацрта?Нема да ти нацрта пунто во профил, југо, фичо..туку лимузина...МЕРЦЕДЕС.Мажите се деца брее..

И така еден ден дур вегетирав низ станот ми се јавува Драж на телефон.

Скопје си? Дома си? Слободен си?
-Да.
-Идам.

Ете го Драж на врата во капутот ги врти клучојте од "слонот".Фативме муабет шопрајш-какопрајш.Дур варев кафе го гибам другарски со форите од средно.

-Си го заноси ти ама капутчето.А слушам и сите пички во Љубљана си ги ебел..не за нешто друго..најмногу место имаш во колата.

(се смеј)
-Брат, ако ме верваш, ете првпат кај шо си идам по 6 месеци, капутов прв пат го облеквам.Скиснав во мочаната униформа на хотелот.Пижами-униформа-пижами-униформа.Тоа е тоа.
Колата ми рѓоса в место.Само паркинг плаќам мамичето..Арно сеа Хрватска на враќање ја пуштив на автопат да се издува.

Со Драж музички многу не се согласуваме.Типот е кафански чоек, мераклија по Харис и Тома, а јас сум по "некапените", "ненормалните", "хевиметалците"..Aма двајцата го сакаме Балашевиќ.Дури имаме иста омилена песна од него сеа...

Djaba bilo konja vranih
Po livadi razigranih
Djaba bilo karuca i salasa.
Djaba bilo njiva plodnih
Vinograda blagorodnih
U karuce pregnutih cilasa

Е Драж, Драж..